અવળચંડા ફૂલો

આગળ પાછળના સંદર્ભ વિના જેનું ધડ-માથું ન મળે એવી કવિતા લખવાની આ ખોટી આદત પડી છે! એ વેઈવેઈ અને એના કામ વિષે થોડું જાણ્યા વગર આ કવિતામાં મજા નહિ આવે! એ વેઈવેઈને ન ઓળખાતા હો તો એમની ઓળખાણ મને જેમણે કરાવી એ મિત્ર ઋતુલના બ્લોગ  ચરખો પર જઈ એ વેઈવેઈ વિષેની રસપ્રદ પોસ્ટ  પહેલા વાંચી આવવા ખાસ ભલામણ છે. ____________________________________________

બધા ફુલોથી
સાવ અવળું
ને મૂળ વાત તો એ કે
સુરજથીય
મોં ફેરવીને ઉઘડ્યું છે
એક સૂરજમુખીનું ફૂલ.


માળીનું ચસકી ગયું હશે
એવું લાગે ક્યારેક.
કાલે કહેતો હતો,
"રાષ્ટ્રીય રેડીઓ પર
રમુજી કાર્યક્રમ
ન આવતો હોય
ત્યારેય
એ ફૂલ
મનફાવે ત્યારે
હસતું રહે છે -
ઉભા ખેતરે.

બીજા બધા રડતા હોય તો પણ.

ને ક્યારેક તો,
કશી વાત ન હોય તોય
મરકતું રહે છે
એને જ તાકી રહેલા
બીજા બધ્ધાં ફૂલોના ટોળા સામે".


માળી સાચો હોય  કે ન હોય
એને
સુરજમુખીતો શુ
ફૂલ પણ ન કહેવાનું
ફરમાન જારી કરો -
આજે જ!


તોય ન સમજે તો
એને પોતાના
સ્થાનેથી એક તસુ
પણ ચસકવાની
રજા ન આપશો.
ને પૂછો એને
એના મલકાટનો
મતલબ.
 ***
એકાદ
મ્યુટેશન હશે?
કે થઇ  હશે એ  જ  'ભૂલ' 
ફેક્ટરી જેવી ચોકસાઈથી

એ વેઈવેઈથી એના ઘાટ માં?     

ખેતરે-ખેતરે
વેરાઈ ચુક્યા છે જે 
'સુરજમુખી'ના
કરોડો બી!

(શબ્દાર્થ: મ્યુટેશન = ઓચિંતો અને દેખીતા બાહ્ય સંચાર વિના આવતો ફેરફાર)