બેઘર

એણે

ફંફોસીને
કચરાપેટીમાંથી
મેં હમણા જ ફેંકેલી

એક સાવ ખાલી

જ્યૂસની બાટલી ખોળી કાઢી

અને એના પર છાપેલી

ન્યુટ્રીશનલ માહિતી 

મોટે મોટેથી વાંચવા લાગ્યો

જેમ જેમ એ વાંચતો ગયો

એમ એમ એ લાગલો જ હસતો ગયો.

કદાચ
આટલી બધી કેલેરી
ધીમી ગતિએ ફાંદમાં કેવી રીતે ફેરવાતી હશે
એની કલ્પના કરીને હસતો હોય કે પછી...

જે જ્યૂસ પીએ છે
એ બાટલી પરના લેબલ વાંચતો નથી
અને જે વાંચે છે
એ કદી જ્યૂસ પીવા પામતો નથી
એ વિપરીતતાને લઈને હસતો હોય કે પછી...

***

ખેર,
એણે પહેલા
ઘર-બાર ગુમાવ્યા હશે
કે માનસિક સંતુલન

એ વિચારતા વિચારતા
મેં મારા ઘર ભણી ડગ માંડ્યા.